Sashen dake kula da albarkatun mai, DPR na kamfanin NNPC, ya ziyarci gidajen mai 166 a jihar Kano inda ya rufe guda 8 daga ciki waɗanda aka samu da boye man da kuma sayar da shi akan farashi fiye da ka’ida.
Yayin duba gidajen man, mukaddashin kwantirola me kula da aiyuka a ofishin hukumar dake Kano, Paul Jhezi ya ce an gudanar da ziyarar gani da ido zuwa gidajen mai a dukkanin kananan hukumomi 44 dake jihar.
Jhezi ya ce makusudin ziyarar zuwa gidajen man shine don tabbatar da cewa an kawar da layukan mai a jihar idan aka yi duba da ƙarin yawan mai da jihar ta samu daga kamfanin NNPC.
Yace tuni aka kara tura karin jami’ai zuwa sassa daban-daban na jihar domin tabbatar da cewa gidajen mai sun bi ka’ida wajen sayar da mai.
