Asalin hoton, DSS/Facebook
Hukumar tsaro ta farin kaya a Najeriya ta ce ta shaida wasu jiga-jigai a wata maƙarƙashiya ake kitsawa don kafa gwamnatin riƙon ƙwarya a ƙasar.
Hukumar ta ce maƙarƙashiyar, wanda wasu ke izawa ba kawai abu ne da ya saɓa wa doka ba, wani ƙoƙarin masu jamhuru ne na kifar da tsarin mulkin Najeriya da kuma jefa ƙasar cikin wani rikici da za a iya kaucewa.
Ta ce tunanin kafa gwamnatin riƙon ƙwarya, abu ne da ba za a amince da shi ba a tsarin dimokraɗiyya da kuma zaman lafiyar al’ummar ƙasar.
A saƙon da ta wallafa a shafinta na Tuwita ɗauke da sa hannun jami’in yaɗa labaran hukumar, Peter Afunanya, DSS ta ce tun bayan zaɓukan ƙasar da aka kammala cikin kwanciyar hankali, ake ta raɗe-raɗin za a kafa gwamnatin riƙon ƙwarya.
Masu kitsa wannan makirci, a ganawar da suke yi in ji ta, suna auna batutuwa da dama a ciki har da yadda za su ɗauki nauyin zanga-zanga maras iyaka a manyan birane ta yadda daga bisani za a ayyana dokar ta-ɓaci .
Wani abin kuma shi ne, su samu umarnin kotu don hana rantsar da sabbin shugabanni da ƴan majalisa a matakin tarayya da jihohi.
Hukumar DSS dai ta bayyana goyon bayanta ga Shugaba Muhammadu Buhari a ƙudurinsa na tabbatar da ganin an miƙa mulki ba tare da wani tashin hankali ba kuma za ta yi aiki tuƙuru don ganin tabbatuwar hakan.
Ta kuma goyi bayan kwamitocin miƙa mulki da shugaban ƙasar ya kafa da kuma waɗanda aka kafa a jihohi.
Hukumar ta ƙara da cewa za ta yi aiki da sauran hukumomin tabbatar da tsaro domin ganin an yi bikin miƙa mulki a ranar 29 ga watan Mayun 2023.
DSS ta kuma gargaɗi masu shirin daƙile dimokraɗiyyar ƙasar su janye ƙudurinsu ta kuma buƙaci hukumomi a ɓangaren shari’a da kafofin labarai da ƙungiyoyin farar hula su zama masu lura da taka tsantsan don kada a yi amfani da su wajen tayar da fitina da ruguza zaman lafiyar ƙasar.
