Hukumomi a jamhuriyar Nijar sun ce ‘yan ƙasar sun fara amsa kira, wajen kai bindigoginsu don yin rijista a ƙarƙashin wani shiri da aka ƙaddamar ranar Talata.
Shirin zai tabbatar da yin rijista ga ɗaukacin bindigogin da fararen hula suka mallaka ta hanyar ofishin ministan cikin gida da haɗin gwiwar hukumar yan sanda.
Muhukunta sun ce maƙasudin aikin shi ne yi wa bindigogin lamba don sanin taƙamaiman adadin kayan harbin da ke hannun ‘yan ƙasar, da kuma tantance masu riƙe da bindigogi da izinin gwamnati a illahirin Nijar.
Ba su dai bayyana tsawon lokacin da za a kwashe ana aikin yi wa bindigogin lamba tare da tantance masu riƙe da su da izinin hukumomin ƙasar ba.
Nijar, na cikin ƙasashen Sahel masu fama da rikicin ƙungiyoyi masu iƙirarin jihadi irinsu Boko Haram da gungun masu fasa-ƙwaurin haramtattun kayayyaki ciki har da miyagun ƙwayoyi da makamai.
Masharhanta sun yi ta bayyana damuwa kan fantsamar makamai da bindigogi ta ƙasashe masu makwabtaka da Libya, kamar Jamhuriyar Nijar a faɗin yankin Sahel tun bayan faɗuwar gwamnatin Moammar Gaddafi a 2012.
Bindigogi kamar fistol na cikin kayan harbin da ake yi wa rijista a ƙarƙashin wannan shiri.
Shirin na haɗin gwiwa da hukumar ‘yan sanda zai karaɗe duk jihohin Nijar
Nijar ta ce shirin na da burin taimakawa wajen shawo kan matsalar yaduwar bindigogi tsakanin al’umma a faɗin ƙasar, matsalar da aka yi imani tana ta’azzara matsalar tsaro.
Kamfanin da Nijar ta damƙa wa alhakin gudanar da wannan gagarumin aiki ya ce sun ƙaddamar da shirin ne a Niamey, babban birnin ƙasar, kafin faɗaɗa shi zuwa sauran jihohi.
Jami’in kula da ayyuka na kamfanin SONIMA, Karimoun Albert Paul ya ce zuwa yanzu mutane sun amsa kira.
Shi ma wani ɗan Nijar da ya mallaki bindiga, kuma ya kai ta don yin rijista ya yaba da wannan tsari. Mutumin wanda bai yarda a ambaci sunansa ba, ya ce shirin zai ƙarfafa gwiwa kuma su samu kwanciyar hankali saboda a yanzu sun cika ƙa’idar malakar makami kuma riƙe da shi bisa izinin mahukunta.
Haka zalika, shugaban ƙungiyar masu sana’ar sayar da bindigogi a Nijar, Moussa Ahmed ya ce suna goyon bayan wannan shiri, da zai kawo ƙarshen mallakar bindigogi ta haramtacciyar hanya.
A cewar SONIMA daga ƙaddamar da shirin zuwa yanzu, kamfanin ya yi wa bindigogi kusan 800 lamba.
