Asalin hoton, Getty Images
Bayan kimanin shekara 60 da kashe tsohon shugaban Amurka John F Kennedy, an samu wani sabon bayani game da ɗaya daga cikin kisan da ya girgiza Amurkawa a tarihi.
Paul Landis, mai shekara 88 tsohon jami’in keƙen asiri, yana kusa a lokacin da aka kashe tsohon shugaban, ya ce bayan kisan mista Kenedy shi ne ya ɗauki harsashin da aka harbe shi da shi daga cikin motar tsohon shugaban, sannan ya ajiye shi kan gadon da ka ɗauke shi zuwa asibiti.
Wannan bayani tamkar ya makara a irin wannan batu da ya shuɗe tun shekarun 1960, to amma ga mutanen da suka shafe gomman shekaru suna neman hujjoji dangane da kisan tsohon shugaban, wannan sabon bayani na mista Landi wata babbar makama ce a gare su.
An samu hujjoji masu yawa kan irin hadin bakin da waɗanda ke da hannu, da wanda ya ɗauki nayin kashe shi, da yawan alburusan da aka harbe shi, tun lokacin da aka yi kisan gomma shekaru da suka wuce.
James Robenalt wani masanin tarihi ne a Amurka wanda ya taimaka wa Mista Linda bayyana sirrin ya ce “Haƙiƙa wannan abu ne mai matuƙar muhimmanci kan kisan da aka yi 1963”.
Sabon bayani a tsohon lamari
Batun yadda kaa kashe tsohon shugaban na Amurka, abu ne da kowa ya sani.
A ranar 22 ga watan Nuwamban 1963, Mista Kedeny tare da matarsa Jackie Kennedy, da gwamnan Texas John Connally Jr da matarsa na cikin motocinsu da ke ayarin tawagar shugaban ƙasa, a lokacin da suke tafiya a birnin Dallas, daidai Dealey Plaza, a lokacin da aka buɗe wa tawagarv tasa wuta.
An harbi Mista Kennedy a ka da wuya an kuma harbi mista Connally a baya. jami’ai sun garzaya da su asibitin ‘Parkland Memorial Hospital’ da ke kusa da wurin inda aka tabbatar da mutuwar tsohon shugaban ƙasar, sai dai shi gwamman ya warke bayan an yi masa magani.
Asalin hoton, Getty Images
Rahoton – hukumar da gwamnatin Amurka ta kafa domin binciken kisan ya gano Lee Harver Oswald a matsayin ɗan bindiga guda da ya kai harin. Haka kuma binciken kimiyya da aka yi wa harsasasn da aka yi harbin da su ya tabbatar da haka.
An kama shi tare da harbe shi a hanun ‘yan sanda, jim kaɗan bayan mutuwar Kennedy.
Rahoton ya kuma bayyana cewa harsashi ɗaya ne ya ratsa Kennedy sanna ya wuce ya samu mista Connally, ya kuma ratsa wurare da dama, lamarin da ya aka ƙara tabbatar da cewa mutum guda ne ya kai harin.
Hukumar bicniken kisan ta kuma tabbatar da samun harsashi a kan gadon da aka ɗauki Mist Kennedy zuwa asibiti.
A lokacin babu wanda ya sa daga ina aka samu harsashin, to amma sai aka yi tsammanin cewa likitoci ne suka fiytar da harsashin a lokacin da suke yi masa aiki.
Abin da Paul Landis ke iya tunawa
A ranar da aka yi kisan, Mista Landis, mai shekara 28 a lokacin, na lura da lafiyar matar Kennedy Jackie Kennedy.
A lokacin da lamarin ya fara aukuwa babu tazara mai nisa tsakaninsa da Mista Kennedy, kuma ya ga lokacin da harsashin ke fasa kansa.
Sanna wurin ya hautsune. Abin da Mista Landis ya yi na gaba shi ne, bai gaya wa kowa ba, inda ya ci gaba da tsare sirrin har zuwa gomman shekaru.
A wata tattaunawa da ya yi da jaridar New York Times, Mista Landis ya ce bayan da kwambar motocin shugaban ƙasar suka isa asibiti, sai ya hangi harsashi a motar Kennedy a bayan inda yake zaune.
Sai ya ɗauke shi tare da sanya shi cikin aljihunsa. bayan ada aka shigar da tsohon shugaban ɗakin kula da masu buƙatar gaggawa, sai ya ajiye harsashin a kan gadon da aka kwantar da Kenedy ba tare da wani ya gan shi ba.
“Babu wanda ya ganni a lokacin da hakan ya faru, kuma na ci gaba da riƙe wannan sirrin tamkar jinin jikina,” kamar yadda Mista Landis ya shaida wa Jaridar Times.
“A haka lokaci ya ci gaba da tafiya. Na kuma ji a raina cewa wannan wata ƙaramar hujja ce da a iya gano wani abu daga gareta, kuma bana son wannan hujjar ta ɓata ko ta ɓace.”
Mista Landis bai taɓa nuna wanna hujja ba a baya, kuma hukumar binciken kisan da gwamnatin ƙasar ta kafa bai taɓa tattaunawa da shi ba, bai kuma taɓa rubuta wa a kowane irin rahoton hukuma.
“Ya kasa bacci saboda damuwa, sannan har yanzu ana ɓukatrsa ya yi aiki, kuma yana fama da matsanciyar cutar damuwa,” kamar yadda Mista Robenalt ya shaida wa BBC.
“Ya ma manta da batun harsashin,” in ji Mista Robenalt, wanda ya shafe lokaci mai tsawo ya hira da Misat Landis kan batun.
Ya shafe shekaru yana kauce wa karanta karanta labaran kisan kai, har sai yanzu da ya yanke shawarar bayyana wa duniya abinda ya sani.
Harsashin sirri
Waɗanda suka karanta bayanan Mista landis sun ɗauki mabambantan ra’ayoyi, ya kuma haifar da tarin tambayoyin da suke bukatar amsa.
Mista Robenalt ya shaida wa BBC cewa ya yi imanin cewa labarinsa zai ci karo da hujjar da ake da ita a baya.
Mista Landis ya ce ya yi amanna cewa harsashin da ya samu a motar Kennedy ba shi aka dsamu a gadon asibitin mista Connally ba.
Ya yi amanna cewa harsashin da ya fasa kan Kennedy bai fita daga cikin motarsa ba.
In dai hakan ta tabbata, Mista Robenalt na ganin cewa ba harsashi guda ba ne ya samu Kennedy da Connelly ba.
Asalin hoton, Getty Images
John F Kennedy
Ya yi imanin cewa wannna sabon bayani zai iya sake haifar da shakku kan ko Mista Oswald ne kaɗai ya kai harin.
Idan har ba harsashi daya ne ya yi sanadin jikkatar mutanen biyu ba, shin Oswald zai iya yin harbi biyu cikin hanzari da bindiga ɗaya?, kamar yadda Mista Robenalt ya bayyana cikin rahotonsa da ya yi wa take ‘Vanity Fair Piece’.
Bayanin Mista Landis na fuskantar shakku daga mutane, ciki har da abokin aikinsa wanda shi ma ya kasance cikin tawagar a wannan rana.
Clint Hill, jami’in tsaron da ya yi tsalle zuwa bayan motar Kenndy domin ba shi kariya na da tababa kan wanna sabon bayani na Misat Landis.
“Idan ya duba duk hujjoji da bayanan abubuwan da suka faru, zai fahimci cewa akwai saɓani,” kamar yadda Mista Hill ya shaida wa kafar yaɗa labarai ta NBC News. “Babu wata ma’ana a gare ni cewa ya yi ƙoƙarin sanya shi a kan gadon asibitin tsohon shugaban ƙasar”.
Ga Gerald Posner, ɗan jarida mai bincike kuma marubuci ya ce rahoton da ya samu Lee Harvey Oswald da laifin kisan Kennedy da labarin Mista Landis duk suna tabbatar da cewa harsashi guda ne ya kashe su.
“A yanzu mutane za su fahimce yadda harsashin ya raunata Mista Connally,” in ji shi.
Mista Posner ya ce “Ya kamata a ɗauki bayaninsa da muhimmanci”, to amma kuma akwai shakku kan gaskiyar bayanin mista Landis da ya kwashe shekara 60 yana ɓoyewa.
“Alal misali, a duka hirarrakin da aka yi da mutanen da ke cikin ɗakin kula da marasa lafiyar da Mista Kennedy ke ciki a asibitin Parkland, babu wanda ya ambaci kasancewar Misat Landi a cikin ɗakin,” in ji Mista Posner.
Da kuma kasancewar Mista Landis bai taɓa fitowa ya yi bayani ba, ya haifar da ayar tambaya game da aikinsa a wanna rana, in ji Posner.
To sai dai batun cewar Mista Landis ya zo da wani sabon sirri ko kuma ya tabbatar da binciken farko kusan duka abu guda ne.
Shi ne dai kisan Kennedy, don haka sabon bayanansa zai tabbatar da muhawarar da ake yi kan kisan ɗaya daga cikin manyan abubuwan da suka faru a Amurka.
“Shin ko za a iya samun bayanan da kowa zai gamsu da su ɗari bisa ɗari? ina! ba zai yiwu ba” in ji Mista Posner Batu ne da ba zai taɓa wucewa ba, ga mutane da dama.
