Asalin hoton, ARUN CHANDRABOSE
Wadansu masoya kwallon kafa a jihar Kerala da ke kudancin Indiya sun burge mutane a kasar da kwallon kruket ke da matukar farin jini.
Auren Sachin R da matarsa R Athira ya fado ranar da za a buga wasan karshe na gasar cin kofin duniya tsakanin Argentina da Faransa.
Bakinsu ya zo daya a kan komai game da aurensu, amma sun sha banban a bangaren kwallon kafa.
A yayin da Sachin ke matukar kaunar Lionel Messi na Argentina, ita kuwa Athira tana goyon bayan tawagar Faransa ne.
Sa’o’i kafin kasashen biyu su fafata a filin kwallo na Lusail a Qatar, su kuma masoyan suka yi aure ne a birnin Kochi na Indiya.
Bayan saka kaya irin na al’ada, ma’auratan su dora rigunan kwallo na masoyansu.
Ita Athira ta dora rigar dan kwallon Faransa, Kyalian Mbappe a yayin da shi kuma Athira ya saka ta Lionel Messi.
Jaridar Malayala Manorama ta bada rahoton cewa ana kammala daurin auren, sai ma’auratan suka wuce gidan angon mai nisan kilo mita 206 daga inda aka yi bukin domin su je su kalli wasan karshen.
Argentina ce ta lashe gasar da ci hudu da biyu a bugun fenariti domin lashe gasar cin kofin duniya.
Jihar Kerala ta kasance daya daga cikin jihohin da Messi ke da masoya sosai kuma an yi shagulgula sosai bayan nasarar Argentina.
